le nom des lieux et des choses

"Li payis d’ Rotchefwârt è-st-onk dès pus amichetôves dol Walonîye. D’on costè, li Tiêr dès Falîzes fét co sondji ôs grands bwès qui gripèt rwèd dins lès rotches èt ôs fonds sôvadjes, pièrdus inte ciél èt têre, dol valéye di Lèsse. Di l’ôte dès costès, li Tîdje d’Èprâve èt lès tiènes di Gn’méle avou leûs fènasses èt leûs trokèts d’ sapins fièt dèdjà pinsè à l’Ârdène. Inte lès deûs, su l’agôche, li plin.ne di Fômène disvôtîye sès patures èt sès têres en ’nn’alant su Potte, Sûzin èt lès Trapisses, ô pîd do Djèrni. Qu’on-z-è vaye su An, su l’ Trape ou èviès l’ Fond dès Vôs, do costè d’Âmerène su l’ Crwès Sint-Djan èt l’ Fond dès Valènes, ou bin su l’ Tiène di Soyêr´ ou pa l’ Fond Sint-Môrtin, à chaque toûrnant di s’ vôye on discouve dès bias cwins èt dès novias côps d’ouy. I-gn-a dès porminâdes po s’ discandji tos lès djoûs. Sins-alè si lon, i-gn-a li Rond do Rwè èt l’ tiène di Bôregârd, qui stramèt d’zos vos pîds tos lès fonds d’ Lomme, on grand ri qui fét brûtyi su lès cayôs sès clérès-éwes ou bin qui catoûne come on nawe ô mitan dès près èt dès cinses di Be.ogne, ou bin èco qui lètche li pîd dès rotches èt dès-ûréyes. Li d’zeû dol vile, li, agritchtéye sès vîyès môjons d’ pîre tot l’ long dol vôye qui mine ôs grotes èt ô tchèstia : li sovenance dès vîs comtes di Rotchefwârt rène pa t’t-avôr-là jusqu’à l’ tchapèle di Lorète èt l’ dréve qu’î mine, avou sès rindjîyes di tiyous vîs d’ trwès cints-ans, nukès, bossus èt k’twardus."